決戰薯片之巔（上）
每個人，都食過薯片。
但點解你依加，唔係食緊薯片呢？
作為薯片帝國嘅創辦人，我嘅父親終其一生都喺度思考呢個問題，希望有更多顧客買佢嘅薯片。
從原料、口味到價格，每個細節都經過再三嘅研究，誓要造出最好嘅薯片。
父親臨終前，將薯片帝國嘅股份分為兩份，我同阿哥一人一半，叮囑我哋要將薯片帝國發揚光大。
股份一人一半，會發生咩事？你係咪會聯想到兄弟鬩牆、商業鬥業，總之兩兄弟搏命爭家產？
冇，呢啲嘢都冇發生，因為我哋都好愛薯片帝國，我哋有共同嘅目標：令全世界都食我哋嘅薯片，日食夜食。
所以，我同阿哥初時合作得好順利。
直到有一次開會，呢排薯片嘅銷量冇乜增長，以前就會出吓新口味，做多啲宣傳咁。
但呢一次，我想展開一個重大嘅改變。
薯片好好食，但你唔會每日食三包薯片，因為薯片唔健康、會肥、會熱氣，我一日食一包已經會爆瘡。
如果我哋將薯片改造健康食物，唔肥唔熱氣，咁大家食幾多薯片都唔驚啦，銷量一定會大幅增加。
阿哥點點頭，提出另一個計劃。
佢認為，我哋雖然有出新口味，但薯片嘅美味度並冇提升。
阿哥形容：「顧客買薯片，通常都係行過見到，先買兩包，甚至見到其他零食就唔買薯片。」
所以，阿哥嘅計劃，係研發一隻最好食嘅薯片，務求令顧客念念不忘。
薯片變得更好味，當然係好事。
我同阿哥一齊努力，一定可以造出一隻又健康又好味嘅薯片，令我哋嘅薯片帝國名揚天下。
理想夠美好，但現實就遇到好多困難。
研發新薯片嘅過程中，我想唔用人工添加嘅味精，用其他更天然更健康嘅成份代替。
但我暫時搵到嘅成份，整出嚟嘅薯片，口感都冇味精薯片咁好。
同時，阿哥為咗提升薯片嘅口感，佢主持嘅實驗中，好多時都會大量增加味精，分明會令薯片變得更唔健康。
我哋嘈咗好多次，但都達成唔到共識。
理念嘅矛盾愈嚟愈大，我哋幾乎反目為仇，研發工作根本冇辦法繼續落去。
最後，我哋將薯片帝國一分為二，我研發「健康薯片」，阿哥就研究「好味薯片」。
公司實力大減，父親嘅心血俾我哋搞成咁，我個心都好痛。
但我相信，只要我研發到一種健康，而又唔太影響口味嘅薯片，一切只會變得更美好。
事到如今，我研發薯片，除咗為咗公司，更有一種好勝心。
我想證明畀阿哥睇，我嘅理念先係啱嘅，健康嘅薯片，先係最好嘅薯片！
我研發出嚟嘅薯片愈嚟愈健康，雖然未到對身體有益，但至少唔會咁熱氣同咁高卡路里。
不過口感方面，始終都比正常薯片略遜一籌。
我本來想將薯片研發得更好，先再推出市場。
但由於我將公司大部份資源，都擺落研發健康薯片上，公司已經有一段時間冇推出新口味薯片，銷量都漸漸下跌。
所以我打算，先將呢款薯片推出市場，挽回一啲熱度，再收集顧客嘅意見，進行改進。
但估唔到，健康薯片大量生產前，大部份資料都被銷毀，令我哋嘅工作受阻，暫時冇辦法量產。
真相好容易搵出嚟，因為真凶主動向我自首：「對唔住，大少爺話，一定唔可以畀呢隻薯片面世。」
佢係公司嘅一個元老，我都好信任佢，估唔到佢係阿哥留低嘅內奸。
下集：https://bit.ly/2GyLPRz
平等社會：https://goo.gl/Q5t8rQ
練成絕世武功後：https://bit.ly/3eOtUmw
#短故 #短篇 #小說 #陳美濤 #廣東話 #粵語 #tomatochan #決戰薯片之巔
Search